Die Zeidunge för de Frollüt kannste dodran erkenne, dat die emmer so Frollütsname hant wie „Petra“, Brigitte“ odder „Constanze“. Un die send, ejal wie se heesche, och emmer nom selve Müsterke jestrickt: Övver et Antrecke, övver et E-äte un Drinke, övver de Jesonkheed, dr Huushalt; jet vom Dokter un jet övver et Reese.

Dat ess, op dr i-eschte Bleck, janz ongerschiedliche Krom. Äwwer dat hängk alles tesame, do ess Logik dren! Ens e Beispell: Ech wo-er nölich be minne Frisör un moos jet waade. Nu ess dat be däm net schlemm, weil dä nä-ve et Hooreschni-e och en Thek hat un Kaffee un Beer verkoope deet. Äwwer weil sons kenne aan die Thek wo-er, wollt ech en Zeidung lä-ese. Et wo-er äwwer kenn angere mi do als son Frollüts-Zeidung.

Do han ech dann ens erennjeki-eke on dat jefonge: Op de nüngde Siet: „Sonderteil Essen & Trinken“. Do jo-ev et „Auflauf auf Knochenschinken“ un „Oelder Waffeln“, op de nächste Siet „Gütersloher Mettwurstrollen“, „Wurstmus mit Lippischer Ananas und Seranoschinken im Tappa-Trend“. En Siet widder konnste dann e Besteck för hongertnüngunnüngzichfoffzich koope. Dann de nächste Siet: „Ananastorte“, „Birnen-Himbeer-Küchlein“ un dobee noch „Himbeer-Mango-Schnitten“.

Un wenn dat dann alles möt dat düre Besteck jejä-ete wu-ede ess, kannste dree Si-e widder enne Vital-Schlank-Chip för nüngunvetzichdressich koope.

Et hängk ä-ewes alles tesame.

© Manfred Dülpers 2007